دولة التحرير

إنه المكان الأطهر، عندما تخلص النوايا ويتمثل أنقى أنواع الحب أمامك في أشخاص جمعهم حب وطنهم . عندما يشعر الجميع أنهم شخص واحد يجمعهم هدف واحد، عندما يتبلور الحلم الأكبر في عيشة كريمة للجميع حتى وإن كانت فعلياً حياتك مليئة بالرفاهية ولكنك ما زلت تفكر في غيرك. المجتمع من حولك أفسد وزرعت فيه ثقافة العبودية يلومونك على دفاعك الشرعي عن حقوق الغلابة الذين لا يستطيعون الدفاع عنها بسبب الجهل أو الفقر أو الخوف. تتهم بالعمالة وسؤ النية ولكن الهدف السامي دائماً ما يمنحك القدرة على إهمال تلك الاتهامات من أجل تلك الغاية السامية. في دولة التحرير هناك مشاهد لا تعد ولا تحصى تمثل قيمة وعراقة هذه الدولة القائمة في ميدان التحرير ألقائم على ضفاف نهر النيل في مساحة تقدر ٣١,٨٩٠ متر مربع .تلك المشاهد تجعلك تشعر بامل في أمة ضاعت لفترة اقتربت من إكمال عقدها السادس ولكنها أخيراً استطعت أن تجد نفسها بفضل هؤلاء الذين تحررو من قيود العبودية.

بعض من تلك المشاهد التي سوف أقوم بسردها بالعامية  حتى تصل رسالة ذلك المجتمع الشامخ للجميع :

فى دولة التحرير: تلاقى العلمانى بيتناقش مع السلفى و يدخل معاهم اليسارى و الراديكالى و محدش يكفر حد

فى دولة التحرير: تلاقى البنت ماشية بحرييتها و الكل محترمها ايا كان شكلها و بتشوف احساس الامان ده فى عينيه

فى دولة التحرير: تلاقى العالم بيتناقش مع الفلاح البسيط بصدر رحب دون اى طبقية

فى دولة التحرير: الناس الغلابة "البلطجية" مندمجين فى وسط المجتمع و بيدافعوا عنه كمان عشان لقيوا اللى حسسهم بقيمتهم اللى هى فعلا كبيرة جدا

فى دولة التحرير: لما حد تعليمه او فكره قليل شوية و بيقول كلام nonsense الناس بتتناقش معاه و تفهمه مش تنفر منه

فى دولة التحرير: الناس كلها بتحب بلدها لوجه الله مش عشان كام كرسى تحت قبة

فى دولة التحرير: We share wifi spots

فى دولة التحرير: صديقى المدمن بيقول ان ده احسن Detox ممكن يساعده

فى دولة التحرير: صديقى الملحد بيقول ان الهارمونى العفوية اللى بين الناس ديه ناتجة عن عمل هندسى من مهندس حكيم مش نتاج لنظرية العشوائية اكيد

فى دولة التحرير:الناس ادركت ان كل واحد مش عايش لوحده انا راحتى هتيجى من راحة اللى حوليه

فى دولة التحرير: الفنون رجعت بما فيها الفن الثورى بعد مكان الفن عن السيجارة البنى

فى دولة التحرير: محدش يزايد على وطنية حد ولا انتماء حد كله بيحب مصر حتى لو بطرق فكر مختلفة

فى دولة التحرير: الشعب مبيكرهش غير فئتين الفاسد (هيخزوؤه) و الظالم (هيسجنوه)

فى دولة التحرير: اللى اسمه سامبو وبيقولو عليه "شكله" سوابق اما عمل حاجة بطولية متهضمش حقه لا الناس بتقول كلنا سامبو عاش البطل

فى دولة التحرير: الكل بياكل نفس الاكل و يشرب نفس الشرب

فى دولة التحرير: الاجنبى بيجى يتعلم البطولة و صفاء النفوس و يدرسها عشان يعلمها لغيره و يرسم علمنا على وشه

في دولة التحرير: فيه مدرسة يتجمع فيها أطفال الشوارع ليتعلم ويشعر ب الألفة وسط الجميع 

في دولة التحرير: المقابل إلي المفروض تدفعه نظير دخولك واقامتك فيها هو حسن أخلاق و بعدك عن العادات السيئة

في دولة التحرير: الجميع تذكر أنه بشر وأول صفات البشر هي التعايش سوياً في تسامح وود وحرص على مصلحة الأخر كحرصك على مصلحتك الشخصية  

من الأخر انا لقيت فى دولة التحرير اقرب مثال ليوتوبيا و عرفت يعنى ايه ايفوريا فى وشوش الناس :)